काठमाडौँ- ऊर्जा जलस्रोत तथा सिँचाइमन्त्री दीपक खड्काले नेपाल विद्युत् प्राधिकरणका नवनियुक्त कार्यकारी निर्देशक हितेन्द्रदेव शाक्यलेलाई डेडिकटेड र ट्रंकलाइन बक्यौता तत्काल असुल गर्ने प्रक्रिया अगाडि बढाउन निर्देशन दिएका छन्।
शाक्यलाई सपथग्रहण गराउँदै मन्त्री खड्काले यस्तो निर्देशन दिएका हुन्। ऊर्जामन्त्री खड्काले उद्योगीसँग प्राधिकरणले लिनुपर्ने बक्यौता मन्त्रिपरिषद्को निर्णयलाई समेत ध्यानमा राखी तत्काल असुल गर्ने प्रक्रिया अगाडि बढाउन एवम् ग्राहकहरूलाई लोडसेडिङ नहुने अवस्था बनाउन निर्देशन दिए ।
मन्त्री खड्काले ऊर्जा क्षेत्र नेपालकै समृद्धिको प्रमुख आधार रहेको भन्दै विद्युत् प्राधिकरणले इमानदार भएर जनताको पक्षमा नतिजा देखिने गरी काम गर्न निर्देशनसमेत दिए ।
मन्त्रालयका सचिव सुरेश आचार्यले अहिलेको चुनौतीपूर्ण अवस्थामा प्राधिकरणको साख जोगिने गरी काम गर्न निर्देशन दिए। नवनियुक्त कार्यकारी निर्देशक शाक्यले मन, वचन र कर्मले आफ्नो योग्यता र क्षमताको अधिकतम प्रयोग गरी प्राधिकरणलाई नयाँ उचाइमा पुर्याउने प्रतिबद्धता व्यक्त गरेका छन् ।
