बाजुरा, साउन ५ — लगातार परेको अविरल वर्षापछि आएको पहिरोका कारण बाजुराको बडिमालिका नगरपालिका–६ कोर्ध क्षेत्रमा ६ घरधुरी उच्च जोखिममा परेका छन् भने अन्य १० घरधुरी पनि जोखिममा रहेका छन्।
जिल्ला प्रहरी कार्यालय बाजुराका अनुसार साउन ४ गते राति करिब ९ बजेदेखि परेको अविरल वर्षाका कारण पहिरो जाँदा जमिन भासिएको र बस्ती जोखिममा परेको हो। आज बिहान प्राप्त सूचनापछि जिल्ला प्रहरी कार्यालय बाजुराबाट प्रहरी नायब उपरीक्षक शैलेश्वरी बोहराको नेतृत्वमा तथा बडिमालिका नगरपालिकाको संयुक्त अनुगमन टोली घटनास्थलमा पुगेर स्थलगत निरीक्षण गरेको थियो।
अनुगमनका क्रममा प्रसादे साउद, गोरे साउद, अम्मर साउद, भक्त साउद, लाल साउद र खडक साउदका घरधुरी पूर्ण जोखिममा रहेको पाइएको छ।
त्यसैगरी बल साउद, मन साउद, शिव बडुवाल, जय साउद, नर साउद, भाने साउद, गोरख साउद, अर्का बल साउद, खन्टे ल्वार तथा पवन बिकका घरधुरी पनि पहिरोको जोखिममा रहेका छन्।
घटनामा हालसम्म कुनै मानवीय वा चौपाया क्षति भएको छैन। प्रभावित परिवारहरू तत्काल विस्थापित नभए पनि सुरक्षा सतर्कता अपनाइएको प्रहरीले जनाएको छ।
प्रहरी टोलीले घटनास्थलमा पुगेर आवश्यक सर्जमिन मुचुल्का तयार गरी राहत उपलब्ध गराउन सम्बन्धित निकायमा सिफारिस गरिएको जनाएको छ।
