बाजुरा, असार १ — बाजुराको स्वामीकार्तिक खापर गाउँपालिका–४ वाईकी एक महिला चक्कु प्रहारबाट घाइते भएकी छन्।
प्रहरीका अनुसार मिति २०८३ असार १ गते राति करिब १:३० बजे वर्ष अन्दाजी ३६ की ठुमरा बिष्ट आफ्नै घरको कोठामा सुतिरहेको अवस्थामा एक अपरिचित व्यक्तिले उनलाई भान्सा कोठामा बोलाएको थियो। त्यसपछि उक्त व्यक्तिले बिष्टको घाँटीको बायाँ भागमा धारिलो हतियार (चक्कु) प्रहार गरी घाइते बनाएको प्रहरीले जनाएको छ।
घटनापछि प्रहरी टोलीले तत्काल उद्धार गरी घाइते बिष्टलाई कोल्टी आधारभूत अस्पताल, कोल्टी पुर्याएको थियो। अस्पतालमा सामान्य उपचारपछि थप उपचारका लागि उनलाई नेपालगञ्ज, बाँके रिफर गरिएको छ। हाल उनको अवस्था मध्यम रहेको बताइएको छ।
घाइतेसँग उनका बुवा समुन्द्र बुढा रहेका छन्। घटनामा संलग्न व्यक्तिको नाम, थर तथा ठेगाना खुल्न नसकेको प्रहरीले जनाएको छ।
घटनाबारे थप अनुसन्धान तथा आरोपीको खोजी कार्य जारी रहेको जिल्ला प्रहरी कार्यालय बाजुराले जनाएको छ।
