बाजुरा । जिल्लाको जगन्नाथ गाउँपालिकाले पालिकाको सिफारिस विना बाहिरबाट ल्याएका योजनालाई पालिकामा कार्यान्वयन गर्न नदिने निणर्य गरेको छ ।
पालिकाको दोस्रो गाउँसभा तथा १३ औं वर्षे अधिवेशनले पालिकासंगको समन्वय र सिफारिस विना व्यक्तिगत स्वार्थसहित लाभ लिने गरि संघ र प्रदेशबाट ल्याउने जुनसुकै योजनाहरुलाई पालिकामा कार्यान्वयन गर्न नदिने निणर्य गरेको हो ।
पछिल्लो समय हरेक योजनाहरु कमिसनको आधारमा आउने गरेको चर्चा र योजना ल्याउँदा आफु अनुकुल योजना बनाई काम नगरेरै राज्यको रकम दुरुपयोग हुने खालको गतिविधिहरुको अन्त्य गर्नका लागि गाउँपालिकाले सो निणर्य गरेको जनाएको छ ।
पछिल्लो समय संघ र प्रदेशबाट व्यक्तिगत योजना ल्याउने र काम नगरि रकम कुम्ल्याउने गलत संस्कार विकास भएपछि सुशासन कायम गर्न र राज्यको लगानीको सही सदुपयोग गर्न पालिकाले यस्तो निणर्य गरेको गाउँपालिकाका अध्यक्ष कालीबहादुर शाहीले बताउनु भएको छ । बाजुराका ९ वटा स्थानीय तह मध्ये यस्तो निणर्य गर्नेमा जगन्नाथ गाउँपालिका पहिलो हो ।
