बाजुरा जिल्लाको बुढीनन्दा नगरपालिका(२ स्थित जन प्रकाश माध्यमिक विद्यालयले आफ्नो २८औँ अभिभावक दिवस तथा ६५औँ वार्षिकोत्सव भव्य रूपमा सम्पन्न गरेको छ। विद्यालयले विशेष कार्यक्रमको आयोजना गर्दै अभिभावक, विद्यार्थी, शिक्षक तथा स्थानीय समुदायको उल्लेखनीय सहभागितासहित उक्त उत्सव मनाएको हो।
विद्यालय व्यवस्थापन समितिका अध्यक्ष नन्दराम बिष्टको अध्यक्षतामा सम्पन्न कार्यक्रममा नगर प्रमुख जनक कुमार बोहोरा प्रमुख अतिथि रहनुभएको थियो। त्यस्तै, पूर्व राष्ट्रिय विकास स्वयंसेवक उत्तम प्रसाद उपाध्याय, वडा अध्यक्षहरू, विभिन्न विद्यालयका शिक्षक, समाजसेवी, अभिभावक तथा विशिष्ट व्यक्तित्वहरूको उपस्थिति रहेको थियो।
कार्यक्रमका क्रममा प्रधानाध्यापक अनोजराज गिरिले विद्यालयको प्रगति, चुनौती तथा आगामी योजनाहरूबारे प्रतिवेदन प्रस्तुत गर्नुभएको थियो। अवकाश हुन चार दिन मात्र बाँकी रहेको अवसरमा उहाँले विद्यालयलाई विभिन्न तरिकाले योगदान पुर्याउने सबै दाताहरू, सहयोगी संस्थाहरू तथा अभिभावकहरूप्रति आभार व्यक्त गर्नुभयो। विद्यालयको भौतिक तथा शैक्षिक विकासमा बुढीनन्दा नगरपालिकासहित भारत सरकार, सुदूरपश्चिम प्रदेश सरकार, आइडियस, पिसबिन, सेतो गुराँस लगायतका संस्थाहरूको महत्वपूर्ण योगदान रहेको उहाँले बताउनुभयो।
ूगुणस्तरीय शिक्षाका लागि विगत, वर्तमानको समीक्षा तथा भावी योजना भन्ने मूल नाराका साथ आयोजित कार्यक्रममा विद्यालयका शैक्षिक तथा भौतिक पूर्वाधारको विकासबारे छलफल गरियो। प्रधानाध्यापक गिरिले ६५ वर्षको यात्रा समीक्षा गर्दै हाल विद्यालयमा १,०८२ विद्यार्थी अध्ययनरत रहेको जानकारी दिनुभयो । अत्याधिक मोबाइल प्रयोगका कारण अपेक्षित शैक्षिक सुधार हासिल गर्न चुनौती रहेको बताउनुभयो ।
